Kuri uyu wa Gatandatu Tariki ya 10 Ugushyingo 2018, amarushanwa y’imikino ya Volley Ball mu Rwanda 2018/2019 aratangira, aya marushanwa agiye gutangirana icyuho nyuma yuko amakipe 3 yaciye agahigo muri uyu mukino atazitabira aya marushanwa.

Amakipe yasezeye yashyikirije amabaruwa abyemeza ishyirahamwe ry’umukino wa Volley Ball mu Rwanda . Nkuko urutonde rw’amakipe azitabira ruri, uyu mwaka shampiyona izitabirwa n’amakipe 7 aho kuba 10 nkuko byari bisanzwe. Ayo makipe ni Gisagara Volley Ball Club, REG ,UTB, APR, Kirehe, IPRC y’Uburasirazuba na IPRC y’Uburengerazuba.

Amakipe yamaze gusezera ni KVC ,ikipe y’ubukombe yazamuye abakinnyi b’ibihangange bazwi mu Rwanda nka Rubayita Cesar, Kangabo Benjamin, Mukunzi Christopher na Eric Nsabimana bita ’Machine’, indi kipe ni UNIK nayo y’ubukombe yahoze yitwa INATEK ikaba yaranatwaye ibikombe bya shampiyona muri 2015 na 2016 na IPRC South.

Ikibazo kinini kiremereye ngo cyateye aya makipe kwivana muri iyi Shampiyona ni amikoro nkuko babigaragaje mu mabaruwa bandikiye ishyirahamwe ry’uyu mukino.

Amikoro ni ikibazo abakunzi ba Shampiyona ya Volley Ball mu Rwanda bavuga ko gishobora gutuma uyu mukino usubira inyuma mu Rwanda.

Shampiyona iratangira mu mpera z’iki Cyumweru kuri uyu wa Gatangatu tariki ya 10 Ugushyingo 2018.

 

radiotv10/IGISUBIZO.COM