Shadow

Kigali International Peace Marathon 2021 abanyamahanga bigaragaje

Kuri iki Cyumweru tariki 20 Kamena 2021 ni  bwo habaye  isiganwa rya Marato Mpuzamahanga yitiriwe Amahoro ku nshuro ya 16  “Kigali International Peace Marathon 2021”.

Iri siganwa ryabaye hubahirizwa amabwiriza yo kwirinda COVID-19 aho abasiganwe mu byiciro byose babanje kwipimisha iki cyorezo.

Mu gice cya Marato “Half Marathon”, intera ya kilometero abakinnyi b’u Rwanda bitwaye neza  aho mu bagabo Nimubona Yves yabaye uwa mbere akoresheje isaha 1, iminota 03 n’amasegonda 38. Yakurikiwe na   Kimining Shadrack (1h03’48”) na Joel Mwangi Maina (1h04’36”) bakomoka muri Kenya.

Mu bagore, Yankurije Marthe  wegukanye umwanya wa kabiri ubwo iri rushanwa riheruka muri 2019 yegukanye umwanya wa mbere aho yakoresheje  isaha 1, iminota 15 n’amasegonda 07. Yakurikiwe na Musabyeyezu Adeline  (1h16’28”) naho ku mwanya wa 3 haza Kimitei Edna Jerono (1h19’49”) ukomoka muri Kenya.

 Abakinnyi bo muri Ethiopia na Eritrea ni bo bitwaye neza muri Marato

Mu gusiganwa Marato “Full Marathon”, intera ya kilometero 42, abakinnyi bakomoka muri Ethiopia na Eritrea mu bagabo n’abagore ni bo bitwaye neza.

Mu bagabo,  Kindie Derseh ni we wegukanye umwanya wa mbere aho yakoresheje amasaha 2, iminota 23 n’amasegonda 29. Yakurikiwe ku mwanya wa kabiri na Berhane Hidru ukomoka muri Eritrea (2h23’31”) naho ku mwanya wa gatatu haza Meseret Dekebo  ukomoka muri Ethiopia (2h23’33”).

                                                              Kindie Derseh wegukanye Marato ya 2021

Muri iki cyiciro, umukinnyi w’Umunyarwanda waje hafi ni Dakuru David ukinira Police AC wasoreje ku mwanya wa 5 abandi ni Nizeyimana Alexis (7), Kwizera Felix (8), Munyaneza Robert (9) na Simukeka Jean Baptiste (10).

Mu bagore, Isgah Cheruto ukomoka muri Kenya  ni we wegukanye umwanya wa mbere akoresheje amasaha 2, iminota 51 n’amasegonda 43. Ku mwanya wa kabiri haje Melhawi Kesete ukomoka muri Ethiopia (2h54’21”) naho ku mwanya wa 3 haza Teweldebrhan Lemlem ukomoka muri Eritrea (2h57’10”).

Umukinnyi ukomoka mu Rwanda waje hafi ni Mukasakindi Claude waje ari uwa 4 (3h12’47”) na Musabyimana Agnes wasoreje ku mwanya wa 5 (3h17’33”).

Nyuma y’iri siganwa, Perezida w’ishyirahamwe ry’imikino ngororamubiri mu Rwanda “RAF”, Mubiligi Fidele yatangaje ko umwaka ushize irushanwa ritabaye kubera COVID-19  uyu mwaka bakagerageza bigakunda.

Perezida wa RAF, Mubiligi Fidele avuga ko muri  rusange bishimira uko irushanwa ryagenze kandi byanabasigiye ubunararibonye kuba ribashishe kuba mu bihe bigoye nk’ibi. Yanishimiye umusaruro w’abakinnyi cyane cyane mu gice cya Marato kuko mu bagabo n’abagore ababaye aba mbere ari Abanyarwanda.

Minisitiri wa Siporo Munyangaju Aurore Mimosa yavuze ko iri rushanwa ryateguwe mu buryo budasanzwe kubera COVID-19  ari yo mpamvu amabwiriza yo kwirinda yashyizwe imbere bigatuma rititabirwa cyane. Yagize ati : “Twishimiye uko byagenze n’uburyo abakinnyi b’u Rwanda bitwaye  twabyishimiye.”

Mu gihe Marato Mpuzamahanga yitiriwe Amahoro ya Kigali yari imaze kugera ku rwego rwo kwitabirwa n’abantu bagera  ku bihumbi 10 uyu mwaka kubera COVID-19 yitabiriwe n’abagera ku 1000.

Muri rusange abegukanye imidari muri buri cyiciro:

Marato (42km)
Abagabo
1.Kindie Derseh 2h23’29”
2. Berhane Hidru 2h23’31”
3.Meseret Dekebo 2h23’33”
Abagore
1.Isgah Cheruto 2h51’43”
2.Melhawi Kesete 2h54’21”
3.Teweldebrhan Lemlem 2h57’10”

Igice cya Marato (21km)
Abagabo
1.Nimubona Yves 1h03″38″
2.Kimining Shadrack 1h03’48”
3.Joel Mwangi Maina 1h04’36”
Abagore
1. Yankurije Marthe 1h15’07”
2. Musabyeyezu Adeline 1h16’28”
3. Kimitei Edna Jerono 1h19’49”

 

 

Leave a Reply

Your email address will not be published. Required fields are marked *