Shadow

Julen Lopetegui watozaga Real Madrid yirukanywe

Real Madrid yirukanye Julen Lopetegui wari umutoza wayo wari umaze amezi ane n’igice gusa ayitoza. Mu kwezi kwa gatandatu ni bwo uyu Munya-Espanye yari yasimbuye Umufaransa Zinedine Zidane.

Gutsindwa kwa Real Madrid ku cyumweru gishize itsindwa ibitego 5-1 na mucyeba Barcelona mu mukino uzwi nka El Clasico,nibyo bifatwa nk’indunduro yo kwirukanwa kwa Lopetegui kuko wari umukino wa gatanu Real itsinzwe mu mikino itandatu.

Ikipe ya Real Madrid yegukanye igikombe cya Champions League mu myaka itatu ishize, ubu iri ku mwanya wa cyenda muri shampiyona ya Liga yo muri Espagne.

Ni bwo itangiye shampiyona nabi cyane kuva mu mwaka w’imikino wa 2001-2002.

Lopetegui w’imyaka 52 y’amavuko, agiye “gusimburwa by’agateganyo” na Santiago Solari wahoze akinira Real Madrid, kuri ubu akaba ari umutoza w’ikipe ya kabiri ya Real izwi nka Castilla.

Ku wa mbere, Lopetegui yari yayoboye imyitozo y’iyi kipe, ariko inama nyobozi ya Real Madrid ni yo yaje kwemeza ko yirukanwa.

Itangazo ry’ubuyobozi bw’ikipe ryavuze ko “hari itandukaniro rikomeye hagati y’ubushobozi bw’akinnyi ba Real Madrid n’umusaruro umaze kugerwaho kugeza ubu.”

Umunani mu bakinnyi ba Real Madrid kuri ubu, bari ku rutonde rugufi rw’abakinnyi 30 bahatanira igihembo cya Ballon d’Or cyo muri uyu mwaka wa 2018.

Bubaye ubwa kabiri Lopetegui yirukanwe muri uyu mwaka.

Habura iminsi ibiri ngo imikino y’igikombe cy’isi cy’umupira w’amaguru itangire mu Burusiya, yirukanwe ku butoza bw’ikipe y’igihugu ya Espagne.

Icyo gihe yirukanwe nyuma yaho ishyirahamwe ry’umupira w’amaguru rya Espagne rimenyeye ko yari mu biganiro byo gutoza Real Madrid nyuma y’imikino y’igikombe cy’isi – ibiganiro ryatangaje ko atari yarigeze aribwiraho mbere.

BBC/IGISUBIZO.COM

 

 

Leave a Reply

Your email address will not be published. Required fields are marked *