Tuesday, September 21
Shadow

Côte d’Ivoire: Nyuma y’imyaka icumi badacana uwaka Alassane Ouattara na Laurent Gbagbo bongeye guhura

Perezida wa Côte d’Ivoire Alassane Ouattara n’uwo bahoze bahanganye bikomeye Laurent Gbagbo bahanye ikiganza baranahoberana mu nama yabo ya mbere kuva haba intambara mu gihugu mu myaka 10 ishize.
Perezida wa Côte d'Ivoire Alassane Ouattara (ibumoso) asuhuzanya n'uwahoze ari Perezida Laurent Gbagbo             Uwahoze ari Perezida Laurent Gbagbo (wambaye ishati) na Perezida Alassane Ouattara
Aba bagabo bombi bari guharanira ko habaho amahoro n’ubwiyunge. Kuri uyu wa kabiri, mu murwa mukuru Abidjan, Bwana Ouattara, w’imyaka 79, yahaye ikaze mu biro bye Bwana Gbagbo, w’imyaka 76.

Mu kiganiro n’abanyamakuru nyuma y’inama yabo, Bwana Ouattara yavuze ko akaduruvayo bagashyize inyuma yabo.  Yongeyeho ati: “Icy’ingenzi kuri Côte d’Ivoire ni amahoro mu gihugu cyacu”.

Bamwe babona uku guhura kwabo nk’ikimenyetso cyo gukira ibikomere kw’iki gihugu, ariko Justin Katinan Koné, umuvugizi wa Bwana Gbagbo, yasabye abantu “kutaremereza cyane” guhura kwabo.

Laurent Gbagbo utaremeraga ko yatsinzwe yakuwe ku butegetsi  yafatiwe mu ngoro ya perezida mu kwezi kwa kane mu 2011  ku ngufu ndetse arafatwa ashyikirizwa urukiko mpuzamahanga mpanabyaha rw’i La Haye mu Buholandi.

Iyo ntambara yatewe n’uko Bwana Gbagbo yanze kwemera ko yatsinzwe mu matora yahitanye abantu bagera ku 3,000 .

Nyuma yo kugirwa umwere, yagarutse mu gihugu mu kwezi kwa gatandatu yakirwa n’abamushyigikiye.

Aracyafite igifungo cy’imyaka 20 yakatiwe nyuma yuko ahamijwe adahari ubusahuzi bwa banki yo mu karere mu gihe cy’intambara.

Bwana Gbagbo aherutse gutangaza ko we na Henri Konan Bédié, na we wahoze ari Perezida, bishyize hamwe mu kutavuga rumwe n’ubutegetsi bwa Perezida Ouattara.

BBC

 

Leave a Reply

Your email address will not be published. Required fields are marked *