Shadow

Abayisilamu barishimira ubwisanzure bahawe

Ubuyobozi bw’Umuryango w’Abayisilamu mu Rwanda (RMC) buratangaza ko butewe ibyishimo n’imyaka 25 ishize bari mu bwisanzure kubera imiyoborere myiza igihugu gifite.

Abayisilamu basengera hamwe bizihiza umunsi mukuru wa Eid Al-Fitr

Byatangarijwe mu birori byo kwizihiza umunsi mukuru wa Eid Al-Fitr wabaye kuwa 04 Kamena 2019 nyuma y’igisibo gitagatifu kimara igihe cy’ukwezi.

Mufti w’u Rwanda, Sheikh Hitimana Salim, ati: “Twishimiye kwizihiza umunsi mukuru wa Eid Al-Fitr tunishimira imyaka 25 ishize dufite ubwisanzure kuko mbere ya Jenoside yakorewe Abatutsi ibyo bitashobokaga ariko kubera imiyoborere myiza biragenda neza.”

Nk’uko abisobanura, avuga ko idini ry’Abayisilamu rigenda ryiyubaka kuko mbere ya Jenoside nibura abantu 5 ari bo bari bashoboye gusobanukirwa n’igitabo gitagatifu cya Korowani, mu gihe muri iyi myaka 25 nyuma ya Jenoside yakorewe Abatutsi bamaze kuba 155.

Sheikh Hitimana avuga ko by’umwihariko muri uyu mwaka idini ryagaragaje ibikorwa birimo gusura abanyantege nke, kuremera abatishoboye, kunganirana, kubakira abatishoboye, kubagurira mituweri n’ibindi.

Ni muri urwo rwego akomeza gusaba abayoboke b’iryo dini kugira uruhare mu bikorwa biganisha ku iterambere ry’igihugu, kuba imbuto hagati y’abandi banyamadini bimika ubunyarwanda, urukundo, umuco n’iyindi migenzo myiza bakishimisha mu biziruye birinda ibisindisha.

Mufti w’u Rwanda Sheikh Hitimana ashima Imana yashoboje abayoboke b’Idini y’Abayisilamu gusoza igisibo gitagatifu neza kuko hari benshi bagize ibyo bigomwa.

Agira ati: “Imana rurema ikunda abitwararika ikabasaba kuyubaha no kuyitinya. Twashoboye guhangana n’irari ry’umubiri twishyira hamwe kandi twifatanya n’abakene batishoboye”.

Ahamagarira Abayisilamu kumenya ko uyu munsi wa Eid Al-Fitr, ari uw’ibyishimo, ukaba umunsi w’imigisha kandi wo kwishimira umusaruro bavanye mu kwezi kw’igisibo.

Agira ati: “Turahamagarirwa kureka ingeso mbi, kureka ishyari, urwango no guhuguzanya, ahubwo mugashyira hamwe ndetse mukanababarirana kuko mutagira amahoro n’ituze mutubahirije ibiri mu gitabo gitagatifu cya Korowani kandi mukabishyira no mu bikorwa.”

Mufti w
Mufti w’u Rwanda, Sheikh Hitimana Salim

Nk’uko abishimangira, Mufti Hitimana akangurira Abayisilamu guharanira umutekano bakirinda urugomo urwo ari rwo rwose hamwe n’inda zitateganyijwe.

imvahonshya/IGISUBIZO.COM

Leave a Reply

Your email address will not be published. Required fields are marked *